بلوغ المرام

´سیدنا ابوہریرہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ” لذتوں کو توڑ دینے ، کاٹ دینے والی کا ذکر کثرت سے کیا کرو ( یعنی موت کا ) “ اسے ترمذی اور نسائی نے روایت کیا ہے اور ابن حبان نے صحیح قرار دیا ہے ۔

´سیدنا انس رضی اللہ عنہ سے مروی ہے کہ` رسول اللہ صلی اللہ وسلم نے فرمایا ” تم میں سے کسی کو اس مصیبت و تکلیف کی وجہ سے جو اس پر نازل ہوئی ہو موت کی تمنا و خواہش ہرگز نہیں کرنی چاہئیے اور اگر اس کی تمنا ضروری ہو تو پھر اس طرح کہنا چاہیئے «اللهم أحيني ما كانت الحياة خيرا لي وتوفني إذا كانت الوفاة خيرا لي» اے اللہ ! جب تک جینا میرے لئے بہتر ہو اس وقت تک مجھے زندگی عطا فرما اور جب موت میرے لئے بہتر ہو تو مجھے وفات دیدے ۔ “ ( بخاری و مسلم )

´سیدنا بریدہ رضی اللہ عنہ نے نبی کریم صلی اللہ علیہ وسلم سے بیان کیا کہ` آپ صلی اللہ علیہ وسلم نے فرمایا ” مومن کی موت کے وقت اس کی پیشانی پر پسینہ رونما ہو جاتا ہے ۔ “ اس روایت کو تینوں یعنی ترمذی ، نسائی اور ابن ماجہ نے روایت کیا ہے اور ابن حبان نے اسے صحیح قرار دیا ہے ۔

´سیدنا ابوسعید رضی اللہ عنہ اور سیدنا ابوہریرہ رضی اللہ عنہ سے مروی کہ` رسول اللہ صلی اللہ وسلم نے فرمایا ” قریب المرگ آدمی کو «لا إله إلا الله» کی تلقین کرو ۔ “ اسے مسلم اور چاروں یعنی ابوداؤد ، ترمذی ، نسائی اور ابن ماجہ نے روایت کیا ہے ۔

´سیدنا معقل بن یسار رضی اللہ عنہ سے مروی ہے کہ` نبی کریم صلی اللہ علیہ وسلم نے فرمایا ” اپنے مرنے والوں کے قریب سورۃ «يس» پڑھا کرو ۔ “ اسے ابوداؤد ، نسائی نے روایت کیا ہے اور ابن حبان نے اسے صحیح قرار دیا ہے ۔

´سیدہ ام سلمہ رضی اللہ عنہا سے مروی ہے کہ` نبی کریم صلی اللہ علیہ وسلم ابوسلمہ رضی اللہ عنہ کی موت کے وقت تشریف لائے اس وقت ان کی آنکھ کھلی ہوئی تھی آپ صلی اللہ علیہ وسلم نے اسے بند کر دیا اور پھر فرمایا کہ ” جب روح بدن سے نکل جاتی ہے تو آنکھ اس کا پیچھا کرتی ہے ۔ “ اتنے میں گھر کے لوگ آہ و بکا کرنے لگے ، چیخنے لگے ۔ تو آپ صلی اللہ علیہ وسلم نے فرمایا ” اپنے لیے اچھی اور بہتر دعا کرنا کیونکہ جو کچھ تم کہتے ہو اس پر فرشتے آمین کہتے ہیں ۔ “ پھر آپ صلی اللہ علیہ وسلم نے دعا فرمائی «اللهم اغفر لأبي سلمة وارفع درجته في المهديين وافسح له في قبره ونور له فيه واخلفه في عقبه» ” الٰہی ! ابوسلمہ کی مغفرت فرما دے ۔ ہدایت یافتہ لوگوں میں اس کا درجہ و مرتبہ بلند فرما اور اس کی قبر کشادہ و وسیع فرما دے اور اسے منور فرما دے اور اس کے پیچھے رہنے والوں میں نائب و قائم مقام ہو جا ۔ “ ( مسلم )

´سیدہ عائشہ رضی اللہ عنہا سے مروی ہے کہ` نبی کریم صلی اللہ علیہ وسلم جب فوت ہوئے تو آپ صلی اللہ علیہ وسلم کو ایک دھاری دار چادر سے ڈھانپ دیا گیا ۔ ( بخاری و مسلم )

´سیدہ عائشہ رضی اللہ عنہا سے مروی ہے کہ` سیدنا ابوبکر رضی اللہ عنہ نے آپ صلی اللہ علیہ وسلم کی وفات کے بعد آپ صلی اللہ علیہ وسلم ( کی پیشانی ) کا بوسہ لیا تھا ۔ ( بخاری )

´سیدنا ابوہریرہ رضی اللہ عنہ سے مروی ہے کہ` نبی کریم صلی اللہ علیہ وسلم نے فرمایا ” مومن کی روح قرض کے ساتھ اس وقت تک معلق ( لٹکی ) رہتی ہے جب تک اسے ادا نہیں کر دیا جاتا ۔ “ احمد اور ترمذی نے اسے روایت کیا ہے اور ترمذی نے اسے حسن قرار دیا ہے ۔

´سیدنا ابن عباس رضی اللہ عنہما سے مروی ہے کہ` نبی کریم صلی اللہ علیہ وسلم نے اس آدمی کے متعلق جو اپنی سواری سے گر کر جاں بحق ہو گیا فرمایا کہ ” اسے پانی اور بیری کے پتوں سے غسل دو اور اسی کے دو کپڑوں میں کفن دے دو ۔ “ ( بخاری )

´سیدہ عائشہ رضی اللہ عنہا سے مروی ہے کہ` جب صحابہ کرام رضی اللہ عنہم نے نبی کریم صلی اللہ علیہ وسلم کو غسل دینے کا ارادہ کیا تو انہوں نے کہا اللہ کی قسم ! ہمیں علم نہیں کہ ہم نبی کریم صلی اللہ علیہ وسلم کے کپڑے اتاریں جس طرح ہم اپنے مرنے والوں کے کپڑے اتارتے ہیں یا نہ اتاریں ؟ پھر ساری حدیث بیان کی ۔ ( احمد اور ابوداؤد )

´سیدہ ام عطیہ رضی اللہ عنہا سے مروی ہے کہ` نبی کریم صلی اللہ علیہ وسلم ہمارے پاس اس وقت تشریف لائے جب ہم آپ صلی اللہ علیہ وسلم کی صاحبزادی کو غسل دے رہی تھیں ۔ آپ صلی اللہ علیہ وسلم نے فرمایا ” اسے تین یا پانچ مرتبہ ، یا اس سے بھی زیادہ مرتبہ غسل دو ۔ اگر ضرورت محسوس کرو ، غسل پانی اور بیری کے پتوں سے دو ، آخر میں کافور یا فرمایا کچھ کافور ڈالو “ جب ہم فارغ ہوئیں تو ہم نے آپ صلی اللہ علیہ وسلم کو اطلاع بھجوا دی آپ صلی اللہ علیہ وسلم نے اپنا تہ بند اتار کر ہماری طرف پھینک دیا اور فرمایا ” اسے جسم کے ساتھ لگا دو ۔ “ ( بخاری و مسلم ) اور ایک روایت میں ہے کہ غسل دائیں طرف سے اور وضو کے اعضاء سے شروع کرنا ۔ بخاری کی ایک روایت میں ہے کہ ہم نے ان کے سر کے بالوں کو تین حصوں میں تقسیم کر دیا اور ان کو پشت پر ڈال دیا ۔

´سیدہ عائشہ رضی اللہ عنہا سے مروی ہے کہ` رسول اللہ صلی اللہ علیہ وسلم کو سحولیہ کے بنے ہوئے سوتی سفید رنگ کے تین کپڑوں میں کفن دیا گیا تھا ۔ جس میں قمیص اور پگڑی نہیں تھی ۔ ( بخاری و مسلم )

´سیدنا ابن عمر رضی اللہ عنہما نے بتایا کہ` عبداللہ بن ابی جب فوت ہوا تو اس کا بیٹا رسول اللہ صلی اللہ علیہ وسلم کی خدمت میں حاضر ہوا اور عرض کیا آپ صلی اللہ علیہ وسلم اپنی قمیص عنایت فرما دیں کہ میں اس میں اسے کفن دے دوں ۔ آپ صلی اللہ علیہ وسلم نے اپنی قمیص اتار کر عنایت فرما دی ۔ ( بخاری و مسلم )

´سیدنا ابن عباس رضی اللہ عنہما سے مروی ہے کہ` نبی کریم صلی اللہ علیہ وسلم نے فرمایا ” سفید لباس زیب تن کیا کرو یہ تمہارے ملبوسات میں بہترین اور عمدہ لباس ہے اور اپنے مرنے والوں کو بھی اس میں کفن دیا کرو ۔ “
نسائی کے علاوہ اسے پانچوں نے روایت کیا ہے اور ترمذی نے اسے صحیح قرار دیا ہے ۔

´سیدنا جابر رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ” تم میں سے جب کوئی اپنے بھائی کو کفن دے تو اسے اچھا کفن دینا چاہیئے ۔ “ ( مسلم )

´اور انہی ( سیدنا جابر رضی اللہ عنہ ) سے مروی ہے کہ` نبی کریم صلی اللہ علیہ وسلم شہداء احد کے دو دو آدمیوں کو ایک لباس میں جمع کرتے تھے پھر فرمایا ” ان میں سے قرآن کس کو زیادہ یاد تھا ۔ جسے زیادہ یاد ہوتا ، اسے لحد میں پہلے اتارتے ۔ نہ تو ان شہداء کو غسل دیا گیا اور نہ ہی ان کی نماز جنازہ پڑھی گئی ۔ “ ( بخاری )

´سیدنا علی رضی اللہ عنہ سے مروی ہے کہ` میں نے نبی کریم صلی اللہ علیہ وسلم کو فرماتے سنا کہ ” ( بہت ) قیمتی کفن نہ دیا کرو ۔ وہ تو بہت جلد بوسیدہ ہو جاتا ہے ۔ “ ( ابوداؤد )

´سیدہ عائشہ رضی اللہ عنہا کا بیان ہے کہ` نبی کریم صلی اللہ علیہ وسلم نے انہیں فرمایا کہ ” اگر تو مجھ سے پہلے فوت ہو جائے تو میں تمہیں غسل دوں گا ۔ “
اسے احمد اور ابن ماجہ نے روایت کیا ہے اور ابن حبان نے اسے صحیح قرار دیا ہے ۔

´سیدہ اسماء بنت عمیس رضی اللہ عنہا سے مروی ہے کہ` سیدہ فاطمہ رضی اللہ عنہا نے خود یہ وصیت کی تھی کہ سیدنا علی رضی اللہ عنہ خود ان کو غسل دیں ۔ ( سنن دارقطنی )

´سیدنا بریدہ رضی اللہ عنہ سے` غامدیہ کے قصہ میں مروی ہے جسے رسول اللہ صلی اللہ علیہ وسلم نے ارتکاب زنا کی پاداش میں رجم و سنگساری کا حکم دیا تھا کہ آپ صلی اللہ علیہ وسلم نے اس کی نماز جنازہ ادا کرنے کا حکم دیا پھر خود اس کی جنازہ پڑھی اور اسے دفن کیا گیا ۔ ( مسلم )

´سیدنا جابر بن سمرہ رضی اللہ عنہ سے مروی ہے کہ` نبی کریم صلی اللہ علیہ وسلم کی خدمت میں ایک آدمی لایا گیا جس نے تیر سے خودکشی کی تھی ۔ آپ صلی اللہ علیہ وسلم نے اس کی نماز جنازہ نہ پڑھی ۔ ( مسلم )

´سیدنا ابوہریرہ رضی اللہ عنہ سے` اس عورت کے بارے میں جو مسجد میں جھاڑو دیا کرتی تھی ، روایت ہے کہ نبی کریم صلی اللہ علیہ وسلم نے اس کے متعلق صحابہ کرام رضی اللہ عنہم سے دریافت فرمایا تو صحابہ کرام رضی اللہ عنہم نے جواب دیا کہ وہ فوت ہو چکی ہے ۔ آپ صلی اللہ علیہ وسلم نے فرمایا ” تم نے مجھے اطلاع کیوں دی ؟ “ گویا انہوں نے اس کے معاملہ وفات کو معمولی خیال کیا ۔ آپ صلی اللہ علیہ وسلم نے فرمایا ” مجھے اس کی قبر کا راستہ بتاؤ ۔ “ انہوں نے آپ صلی اللہ علیہ وسلم کو اس کی قبر کا راستہ بتا دیا ۔ آپ صلی اللہ علیہ وسلم نے وہاں جا کر قبر پر نماز جنازہ پڑھی ۔ ( بخاری و مسلم ) اور مسلم نے اتنا اضافہ نقل کیا ہے پھر آپ صلی اللہ علیہ وسلم نے فرمایا ” یہ قبریں اہل قبور کے لئے اندھیروں سے بھری ہوئی ہیں اور میری نماز سے ان کی قبروں میں روشنی ہو جاتی ہے ۔ “

´سیدنا حذیفہ رضی اللہ عنہ سے مروی ہے کہ` نبی کریم صلی اللہ علیہ وسلم موت کے لئے کھلے عام منادی سے منع فرمایا کرتے تھے ۔
اسے احمد اور ترمذی نے روایت کیا ہے اور ترمذی نے اسے حسن قرار دیا ہے ۔

´سیدنا ابوہریرہ رضی اللہ عنہ سے مروی ہے کہ` نبی کریم صلی اللہ علیہ وسلم نے نجاشی کی خبر وفات اسی روز دی جس روز وہ فوت ہوا تھا ۔ آپ صلی اللہ علیہ وسلم صحابہ کرام رضی اللہ عنہم کو لے کر جنازہ گاہ کی طرف تشریف لے گئے ۔ صف بندی کروائی اور اس پرچار تکبیریں کہیں ۔ ( بخاری و مسلم )

´سیدنا ابن عباس رضی اللہ عنہما سے مروی ہے کہ` میں نے نبی کریم صلی اللہ علیہ وسلم کو فرماتے سنا ہے کہ ” کوئی مسلمان نہیں مرتا کہ اس کے جنازے میں ایسے چالیس آدمی شریک ہوں جو اللہ تعالیٰ کے ساتھ کسی بھی چیز کو شریک نہیں ٹھہراتے ۔ مگر اللہ تعالیٰ اس مرنے والے کے حق میں ان کی شفاعت قبول فرما لیتا ہے ۔ “ ( مسلم )

´سیدنا سمرہ بن جندب رضی اللہ عنہ سے مروی ہے کہ` میں نے نبی کریم صلی اللہ علیہ وسلم کے پیچھے ایک ایسی عورت کی نماز جنازہ پڑھی جو حالت نفاس میں فوت ہوئی تھی ۔ آپ صلی اللہ علیہ وسلم اس کے درمیان میں کھڑے ہوئے تھے ۔ ( بخاری و مسلم )

´سیدہ عائشہ رضی اللہ عنہا سے مروی ہے کہ` اللہ کی قسم ! رسول اللہ صلی اللہ علیہ وسلم نے بیضاء کے دونوں بیٹوں کی نماز جنازہ مسجد میں ادا فرمائی ۔ ( مسلم )

´سیدنا عبدالرحمٰن بن ابی لیلٰی سے روایت ہے کہ` زید بن ارقم رضی اللہ عنہ ہمارے جنازوں پرچار تکبیریں کہتے تھے مگر ( خلاف معمول ) ایک مرتبہ انہوں نے پانچ تکبیریں کہیں تو میں نے ان سے دریافت کیا انہوں نے جواب دیا کہ نبی کریم صلی اللہ علیہ وسلم بھی پانچ تکبیریں کہتے تھے ۔
اسے مسلم اور چاروں یعنی ابوداؤد ، ترمذی ، نسائی اور ابن ماجہ نے روایت کیا ہے ۔

´سیدنا علی رضی اللہ عنہ سے مروی ہے کہ` انہوں نے سہل بن حنیف رضی اللہ عنہ کی نماز جنازہ میں چھ تکبیریں کہیں اور فرمایا کہ وہ بدری تھے ۔
اسے سعید بن منصور نے روایت کیا ہے اور اس اصل بخاری میں ہے ۔

´سیدنا جابر رضی اللہ عنہ سے مروی ہے کہ` رسول اللہ صلی اللہ علیہ وسلم ہمارے جنازوں پرچار تکبیریں کہا کرتے تھے اور پہلی تکبیر میں سورۃ «فاتحه» ( بھی ) پڑھتے تھے ۔
اسے شافعی نے ضعیف سند سے روایت کیا ہے ۔

´سیدنا طلحہ بن عبداللہ بن عوف رحمہ اللہ سے مروی ہے کہ` میں نے ابن عباس رضی اللہ عنہما کے پیچھے نماز جنازہ پڑھی ۔ انہوں نے اس میں سورۃ «فاتحه» پڑھی اور فرمایا ( میں نے اس لئے سورۃ «فاتحه» پڑھی ہے ) تاکہ تمہیں معلوم ہو جائے کہ یہ سنت ہے ۔ ( بخاری )

´سیدنا عوف بن مالک رضی اللہ عنہ سے مروی ہے کہ` رسول اللہ صلی اللہ علیہ وسلم نے ایک جنازہ پر نماز پڑھائی ۔ میں نے آپ صلی اللہ علیہ وسلم کی دعا میں سے اتنا حصہ یاد کر لیا «اللهم اغفر له ، ‏‏‏‏ ‏‏‏‏ وارحمه ، ‏‏‏‏ ‏‏‏‏ وعافه ، ‏‏‏‏ ‏‏‏‏ واعف عنه ، ‏‏‏‏ ‏‏‏‏ وأكرم نزله ، ‏‏‏‏ ‏‏‏‏ ووسع مدخله ، ‏‏‏‏ ‏‏‏‏ واغسله بالماء ، ‏‏‏‏ ‏‏‏‏ والثلج ، ‏‏‏‏ ‏‏‏‏ والبرد ، ‏‏‏‏ ‏‏‏‏ ونقه من الخطايا ، ‏‏‏‏ ‏‏‏‏ كما ينقى الثوب الأبيض من الدنس ، ‏‏‏‏ ‏‏‏‏ وأبدله دارا خيرا من داره ، ‏‏‏‏ ‏‏‏‏ وأهلا خيرا من أهله ، ‏‏‏‏ ‏‏‏‏ وأدخله الجنة ، ‏‏‏‏وقه فتنة القبر ، ‏‏‏‏ ‏‏‏‏ وعذاب النار» ” اے اللہ ! اس کی مغفرت فرما دے ، اس پر رحم فرما ، اسے عافیت و آرام سے رکھ ، اس سے درگزر فرما ، اس کی مہمان نوازی اچھی فرما ، اس کی قبر کشادہ و فراخ کر دے ، اسے پانی ، برف اور ژالوں ( اولوں ) سے دھو دے ( بالکل صاف کر دے ) اسے گناہوں سے ایسا صاف کر دے جیسا کہ سفید کپڑا میل کچیل سے صاف کیا جاتا ہے ۔ اور اسے دنیاوی گھر سے بہتر اور عمدہ گھر اور اہل و عیال سے بہتر اہل و عیال عطا فرما ، اسے جنت میں داخل فرما ، اسے قبر کے فتنہ و آزمائش اور عذاب دوزخ سے محفوظ رکھ ۔ ( مسلم )

´سیدنا ابوہریرہ رضی اللہ عنہ سے مروی ہے کہ` رسول اللہ صلی اللہ علیہ وسلم جب کسی کی نماز جنازہ پڑھتے تو یہ دعا مانگتے «اللهم اغفر لحينا وميتنا وشاهدنا وغائبنا وصغيرنا وكبيرنا وذكرنا وأنثانا اللهم من أحييته منا فأحيه على الإسلام ومن توفيته منا فتوفه على الإيمان اللهم لا تحرمنا أجره ولا تضلنا بعده» ” اے اللہ ! ہمارے زندوں اور مردوں ، ہمارے حاضر و غائب ، ہمارے چھوٹوں اور بڑوں ، ہمارے مردوں اور عورتوں کی مغفرت فرما دے ! الٰہی ! ہم میں سے جسے تو زندہ رکھے اسے اسلام پر زندہ رکھ اور جسے تو موت دے اسے ایمان کی موت سے سرفراز فرما ! الٰہی ! ہمیں اس کے اجر و ثواب سے محروم نہ رکھ اور نہ ہمیں اس کے بعد گمراہ ہونے دے ۔
اسے مسلم اور چاروں یعنی ابوداؤد ، ترمذی ، نسائی اور ابن ماجہ نے روایت کیا ہے ۔

´سیدنا ابوہریرہ رضی اللہ عنہ سے مروی ہے کہ` نبی کریم صلی اللہ علیہ وسلم نے فرمایا ” جب تم کسی میت کی نماز جنازہ پڑھو تو خوب خلوص دل سے اس کے لئے دعا کرو ۔ “
اسے ابوداؤد نے روایت کیا ہے اور ابن حبان نے صحیح قرار دیا ہے ۔

´سیدنا ابوہریرہ رضی اللہ عنہ روایت کرتے ہیں کہ` نبی کریم صلی اللہ علیہ وسلم نے فرمایا ” جنازہ لے جانے میں جلدی کیا کرو ۔ اس لئے کہ اگر مرنے والا صالح اور نیک آدمی تھا تو اس کے لئے بہتر ہو گا کہ اسے بہتر جگہ کی طرف جلدی لے جاؤ اور اگر دوسرا ہے ( برا آدمی ہے ) تو اپنی گردن سے اتار کر رکھ دو ۔ “ ( بخاری و مسلم )

´سیدنا ابوہریرہ رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ” جو شخص جنازہ کے ساتھ جائے یہاں تک کہ اس کی نماز پڑھی جائے اسے ایک قیراط کے برابر ثواب ملے گا اور جو شخص دفن ہونے کے وقت تک حاضر رہے اسے دو قیراط کے برابر اجر ملے گا ۔ “ دریافت کیا گیا کہ دو قیراط سے کیا مراد ہے ۔ آپ صلی اللہ علیہ وسلم نے فرمایا ” دو قیراط دو بڑے پہاڑوں کے برابر ۔ “ ( بخاری ومسلم )
اور مسلم کی روایت میں ہے ” میت کو قبر میں اتارے جانے تک حاضر رہے ۔ “ اور بخاری کی روایت میں ہے ” جس نے کسی مسلمان کے جنازے میں ایمان اور حصول ثواب کی نیت سے شرکت کی اور نماز جنازہ کے اختتام تک اس کے ساتھ بھی رہا اور تدفین سے فراغت کے بعد واپس لوٹا تو وہ دو قیراط لے کر واپس لوٹا ۔ ہر قیراط احد پہاڑ کے برابر ہے ۔ “

´سیدنا سالم اپنے والد سے روایت کرتے ہیں کہ` انہوں نے نبی کریم صلی اللہ علیہ وسلم ، سیدنا ابوبکر رضی اللہ عنہ اور عمر رضی اللہ عنہ کو جنازے کے آگے چلتے دیکھا ہے ۔
اس کو پانچوں یعنی احمد ، ابوداؤد ، ترمذی ، نسائی ، ابن ماجہ نے روایت کیا ہے اور ابن حبان نے صحیح قرار دیا ہے اور نسائی اور ایک گروہ نے اسے مرسل ہونے کی وجہ سے معلول کہا ہے ۔

´سیدہ ام عطیہ رضی اللہ عنہا سے مروی ہے کہ` ہمیں جنازوں میں شرکت سے منع کر دیا گیا مگر یہ ممانعت ہم پر لازمی قرار نہیں دی گئی ۔ ( بخاری و مسلم )

´سیدنا ابوسعید رضی اللہ عنہ سے مروی ہے کہ` رسول اللہ صلی اللہ علیہ وسلم نے فرمایا ” جب تم کسی جنازے کو آتے دیکھو تو کھڑے ہو جاؤ ۔ نیز جو شخص جنازے کے ساتھ ہو وہ جنازے کے زمین پر رکھے جانے سے پہلے نہ بیٹھے ۔ “ ( بخاری و مسلم )