الادب المفرد

1

فوائد ومسائل:
(۱)مال و اولاد کی حرص انسان کے ضمیر کا حصہ ہے۔ انسان ساری زندگی محنت کرکے مال اکٹھا کرتا رہتا ہے بالآخر سب کچھ چھوڑ کر اس دنیا کو خیر باد کہہ دیتا ہے۔ مرتے دم تک میرا مال میرا مال اس کی زبان پر ہوتا ہے لیکن در حقیقت وہ مال اس کا نہیں ہوتا بلکہ وہ تو اس کے ورثاء کا ہو چکا۔ اس کا مال وہی ہوتا ہے جو وہ اللہ کی راہ میں خرچ کرکے جاتا ہے، اس کا صلہ وہ اللہ کے ہاں پاتا ہے۔
رسول اکرم صلی اللہ علیہ وسلم کا فرمان ہے: ’’جب ابن آدم کی موت کا وقت قریب ہوتا ہے تو وہ کہتا ہے کہ فلاں کو اتنا دے دو اور فلاں کو اتنا حالانکہ اب تو وہ ان کا ہوچکا۔‘‘ (صحیح البخاري، ح:۱۴۱۹)
(۲) مرنے کے بعد انسان کو وہ مال کام آئے گا جو اس نے اللہ تعالیٰ کو خوش کرنے کے لیے اللہ کی راہ میں خرچ کیا ہوگا، دنیا میں چھوڑا ہوا مال اس کے کچھ کام نہ آئے گا بلکہ عین ممکن ہے اس کے لیے وبال جان بن جائے۔ کیونکہ آخرت کو نظر انداز کرکے ورثاء کے مستقبل کی فکر کرنا۔ اولاد کے لیے مال جمع کرنا کہ نہ معلوم ان کے حالات کیسے ہوں گے، ایک طرح سے اللہ تعالیٰ کے بارے میں بدگمانی بھی ہے۔ یہ سوچ غلط ہے کہ اولاد کو رزق میری طرف سے ملتا تھا میرے جانے کے بعد نہ جانے ان کے ساتھ کیا ہوگا بسا اوقات صورت حال اس کے برعکس بھی ہوتی ہے۔ اکثر و بیشتر والدین کی جمع کردہ دولت اولاد بے دردی سے ضائع کر دیتی ہے کیونکہ انہوں نے اس کے کمانے میں مشقت نہیں اٹھائی ہوتی۔