سوال:

کیا سیدنا عمر بن خطاب رضی الله عنه سے آٹھ رکعات تراویح ثابت ہیں؟

جواب:

سیدنا عمر بن خطاب رضی الله عنه نے آٹھ رکعات تراویح پڑھانے کا حکم دیا۔
❀ سیدنا سائب بن یزید رضی الله عنه بیان کرتے ہیں:
أمر عمر بن الخطاب أبى بن كعب وتميما الداري أن يقوما للناس بإحدى عشرة ركعة.
”سیدنا عمر بن خطاب رضی الله عنه نے سیدنا ابی بن کعب رضی الله عنه اور سیدنا تمیم داری رضی الله عنه کو گیارہ رکعت تراویح (مع وتر) پڑھانے کا حکم دیا۔“
(الموطأ للإمام مالك: 138، شرح معاني الآثار للطحاوي: 293/1، السنن الكبرى للبيهقي: 496/2، مشكاة المصابيح: 407/1، وسنده صحيح)
سیدنا عمر بن خطاب رضی الله عنه کا یہ حکم صحیح بخاری و صحیح مسلم والی حدیث عائشہ رضی الله عنہا کے موافق ہے۔ سیدنا عمر بن خطاب رضی الله عنه کا یہ حکم سنت نبویہ صلى الله عليه وسلم کے عین مطابق ہے۔
ثابت ہوا کہ سیدنا عمر بن خطاب رضی الله عنه نے اپنے دور خلافت میں آٹھ رکعات تراویح پڑھانے کا حکم دیا تھا، نیز اس سے بیس رکعت تراویح کے قائلین و عاملین کا رد ہوتا ہے اور ان کا بیس رکعتوں کے سنت مؤکدہ ہونے کا نظریہ خطا قرار پاتا ہے۔
بعض حضرات کہتے ہیں کہ ہم بیس رکعت نماز تراویح اس لیے پڑھتے ہیں کہ سیدنا عمر بن خطاب رضی الله عنه نے بیس رکعات پڑھی تھیں، لیکن سیدنا عمر بن خطاب رضی الله عنه سے بیس رکعت ادا کرنا ثابت نہیں ہوتا، بلکہ عہد فاروقی میں آٹھ رکعت تراویح پر صحابہ کرام کا اجماع تھا۔
❀ سیدنا سائب بن یزید رضی الله عنه بیان کرتے ہیں:
إن عمر جمع الناس على أبى وتميم، فكانا يصليان إحدى عشرة ركعة.
”سیدنا عمر بن خطاب رضی الله عنه نے لوگوں کو سیدنا ابی بن کعب رضی الله عنه اور سیدنا تمیم داری رضی الله عنه کی امامت پر جمع کیا۔ وہ دونوں گیارہ رکعت تراویح پڑھاتے تھے۔“
(مصنف ابن أبي شيبة: 391/2، تاريخ المدينة للإمام عمر بن شبه: 713/2، وسنده صحيح)
❀ سیدنا سائب بن یزید رضی الله عنه بیان کرتے ہیں:
كنا نقوم فى زمان عمر بن الخطاب بإحدى عشرة ركعة.
”ہم (صحابہ) سیدنا عمر بن خطاب رضی الله عنه کے زمانہ میں گیارہ رکعات (تراویح) پڑھتے تھے۔“
(سنن سعيد بن منصور، نقلا عن الحاوِي للفتاوي للسيوطي: 349/1، حاشية آثار السنن للنيموي الحنفي: 250، وسنده صحيح)
❀ علامہ سیوسبکی رحمہ الله لکھتے ہیں:
إسناده فى غاية الصحة.
”اس کی سند انتہائی درجے کی صحیح ہے۔“
(شرح المنهاج، نقلا عن الحاوي للفتاوي: 350/1)
مذکورہ بالا دلائل سے ثابت ہوا کہ سیدنا عمر بن خطاب رضی الله عنه نے سیدنا ابی بن کعب رضی الله عنه اور سیدنا تمیم داری رضی الله عنه کو وتر سمیت گیارہ رکعت تراویح پڑھانے کا حکم دیا تھا اور انہوں نے آپ کے حکم کی تعمیل و تکمیل میں گیارہ رکعت تراویح پڑھائی اور صحابہ کرام نے پڑھی۔ دعا ہے کہ اللہ رب العزت ہمیں بھی عمل کی توفیق عطا فرمائے، آمین!