غنیۃ الطالبین اور شیخ عبدالقادر جیلانی رحمہ اللہ کے متعلق تحقیق

سوال

کیا ’’غنیۃ الطالبین‘‘ نامی کتاب واقعی شیخ عبدالقادر جیلانی رحمہ اللہ کی تصنیف ہے؟ نیز، شیخ عبدالقادر جیلانی رحمہ اللہ کا محدثین اور ائمۂ جرح و تعدیل کے نزدیک کیا مقام ہے؟

جواب

الحمد لله، والصلاة والسلام علىٰ رسول الله، أما بعد!

غنیۃ الطالبین کی نسبت شیخ عبدالقادر جیلانی رحمہ اللہ کی طرف

علمائے کرام کے مابین کتاب ’’غنیۃ الطالبین‘‘ کی نسبت کے بارے میں اختلاف پایا جاتا ہے۔ تاہم، حافظ ذہبی (متوفی ۷۴۸ھ) اور ابن رجب الحنبلی (متوفی ۷۹۵ھ) نے اس کتاب کو شیخ عبدالقادر جیلانی رحمہ اللہ کی تصنیف قرار دیا ہے۔

◈ حافظ ذہبی نے اپنی کتاب العلو للعلی الغفار میں (صفحہ ۱۹۳) اس کتاب کو شیخ عبدالقادر کی طرف منسوب کیا ہے۔
◈ ابن رجب نے الذیل علی طبقات الحنابلہ (جلد ۱، صفحہ ۲۹۶) میں بھی یہی نسبت بیان کی ہے۔

لہٰذا، یہی موقف راجح ہے کہ یہ کتاب شیخ عبدالقادر جیلانی رحمہ اللہ کی تصنیف ہے۔

تنبیہ

مروجہ ’’غنیۃ الطالبین‘‘ کے موجودہ نسخوں کی صحیح و متصل سند فی الحال میرے علم میں نہیں ہے۔
واللہ اعلم

شیخ عبدالقادر جیلانی رحمہ اللہ کا مقام و مرتبہ ائمہ حدیث کی نگاہ میں

شیخ عبدالقادر جیلانی رحمہ اللہ کو ائمۂ حدیث اور علمائے اسلام کے ہاں بہت بلند مقام حاصل ہے۔

حافظ ذہبی رحمہ اللہ کا بیان

’’الشیخ الامام العالم الزاھد العارف القدوة، شیخ الاسلام، علم الاولیاء۔۔۔‘‘
(سیر اعلام النبلاء، جلد ۲۰، صفحہ ۴۳۹)

امام موفق الدین ابن قدامہ رحمہ اللہ کا بیان

’’اخبرنا شیخ الاسلام عبدالقادر بن ابی صالح الجیلی‘‘
(سیر اعلام النبلاء، جلد ۲۰، صفحہ ۴۴۰، سند صحیح)

حافظ ذہبی نے امام بن السمعانی (متوفی ۵۶۲ھ) سے نقل کیا

’’فقیہ صالح دین خیر‘‘
(سیر اعلام النبلاء، جلد ۲۰، صفحہ ۲۰)
تاریخ الاسلام، جلد ۳۹، صفحہ ۸۹

تنبیہ

یہ عبارت الانساب للسمعانی کے پانچ جلدوں پر مشتمل مطبوعہ نسخے سے چھوٹ گئی ہے۔
واللہ اعلم

حافظ ابن النجار رحمہ اللہ کا بیان

’’واوقع لہ القبول العظیم۔۔۔ واظھر اللہ الحکمۃ علی لسانہ‘‘
آپ کو قبولِ عظیم حاصل ہوا، اور اللہ تعالیٰ نے آپ کی زبان پر حکمت جاری فرمائی۔
(تاریخ الاسلام للذہبی، جلد ۳۹، صفحہ ۹۲، وفیات ۵۶۱ھ)

حافظ ابن الجوزی رحمہ اللہ کا تبصرہ

انہوں نے اپنی معروف کتاب المنتظم میں شیخ عبدالقادر جیلانی رحمہ اللہ کا ذکر کیا۔
اگرچہ انہوں نے ان سے شدید اختلاف کیا، لیکن کسی قسم کی جرح نہیں کی۔
(تاریخ الاسلام، جلد ۳۹، صفحہ ۱۸۹)
(المنتظم، جلد ۱۸، صفحہ ۱۷۳، ترجمہ نمبر ۴۲۵۹)

نتیجہ

ان تمام اقوال اور محدثین کی شہادتوں سے یہ بات واضح ہوتی ہے کہ:

◈ شیخ عبدالقادر جیلانی رحمہ اللہ ایک ثقہ، صدوق اور نیک سیرت عالم دین تھے۔
◈ ان کی نسبت سے منسوب کتاب ’’غنیۃ الطالبین‘‘ میں بعض ضعیف اور موضوع روایات بھی موجود ہیں، جن کی موجودگی کو نظر انداز نہیں کیا جا سکتا۔

ھذا ما عندي والله أعلم بالصواب