غسل کے فرائض اور طریقہ کار

سوال:

غسل کے کتنے فرائض ہیں اور وہ کون کون سے ہیں؟

جواب:

الحمد لله، والصلاة والسلام علىٰ رسول الله، أما بعد!

غسل کے درج ذیل فرائض ہیں:

✿ وضوء اور استنجاء کرنا
✿ سر پر تین مرتبہ پانی ڈال کر بالوں کی جڑوں تک پانی پہنچانا
✿ پورے جسم کو دھونا

غسلِ جنابت کا مکمل طریقہ:

حضرت میمونہ رضی اللہ عنہا فرماتی ہیں:

• رسول اللہ ﷺ نے جب غسل کا ارادہ فرمایا تو سب سے پہلے اپنے دونوں ہاتھ دھوئے، پھر اپنی شرمگاہ کو دھویا۔
• پھر بائیں ہاتھ کو، جس سے شرمگاہ کو دھویا تھا، زمین پر رگڑا، اس کے بعد اسے دھویا۔
• پھر کلی کی اور ناک میں پانی ڈالا۔
• پھر چہرہ دھویا، پھر کہنیوں تک دونوں ہاتھ دھوئے۔
• پھر سر پر پانی ڈالا اور بالوں کی جڑوں تک پانی پہنچایا، تین مرتبہ سر پر پانی ڈالا۔
• پھر پورے بدن پر پانی بہایا۔
• پھر اس جگہ سے ہٹ کر، جہاں غسل کیا تھا، پاؤں دھوئے۔

(بخاری، کتاب الغسل، باب الوضوء قبل الغسل)

ھذا ما عندي والله أعلم بالصواب