سوال

جناب، میں ایک پرائیویٹ آئل کمپنی میں ملازم ہوں۔ ڈیوٹی کے سلسلے میں مجھے مسلسل 15 دن اپنے گھر سے تقریباً 60 کلومیٹر دور ایک شہر میں رہنا پڑتا ہے، جبکہ اس کے بعد مجھے 13 دن کی چھٹی ملتی ہے۔ دورانِ ڈیوٹی بھی میں مسلسل سفر میں رہتا ہوں، لیکن یہ سفر میرے آبائی شہر سے کم از کم 60 کلومیٹر اور زیادہ سے زیادہ 100 کلومیٹر کے دائرے میں ہوتا ہے۔

اب میرا سوال یہ ہے کہ ان حالات میں کیا مجھے نماز قصر ادا کرنی چاہیے یا مکمل نماز پڑھنی ہوگی؟

جواب

الحمد لله، والصلاة والسلام علىٰ رسول الله، أما بعد!

آپ کی بیان کردہ صورتحال کے پیشِ نظر، آپ کو ان 15 دنوں کے دوران نماز قصر ہی ادا کرنی چاہیے، کیونکہ آپ ڈیوٹی کے دوران بھی مسلسل سفر کی حالت میں ہوتے ہیں، اور یہ سفر مسلسل جاری رہتا ہے۔

قرآن سے دلیل

ارشاد باری تعالیٰ ہے:
"فليس عليكم جناح أن تقصروا من الصلاة”
(النساء: 101)
ترجمہ:
"پس تم پر کوئی گناہ نہیں کہ تم (سفر میں) نماز قصر کر لو۔”

سنت سے دلیل

حضرت انس رضی اللہ عنہ فرماتے ہیں:
"آپﷺ اگر تین میل یا تین فرسخ کے لیے سفر کو نکلتے تو دو رکعت نماز ادا کرتے۔”
(صحیح مسلم: 641)

اس حدیثِ مبارکہ میں "تین فرسخ” کا ذکر موجود ہے، جو کہ تقریباً 9 سے 12 میل کے برابر بنتا ہے۔ اس سے معلوم ہوتا ہے کہ جو شخص بھی کم از کم تین فرسخ (تقریباً 9 میل یا 12 میل) تک کا سفر کرتا ہے، خواہ وہ یہ سفر روزانہ کرے یا کچھ وقفے سے، وہ شرعی طور پر "مسافر” کے حکم میں آتا ہے۔ لہٰذا وہ نماز قصر کر سکتا ہے۔

قصر اور مکمل نماز کے درمیان انتخاب

اگرچہ بعض لوگوں کا خیال ہے کہ دورانِ سفر مکمل نماز بھی پڑھی جا سکتی ہے، لیکن نبی اکرم ﷺ سے دورانِ سفر مکمل نماز پڑھنے کا کوئی صحیح اور واضح ثبوت نہیں ملتا۔ اس لیے افضل اور بہتر یہی ہے کہ قصر کی جائے۔

امام کے پیچھے نماز کا مسئلہ

البتہ، اگر آپ کسی مسجد میں جماعت کے ساتھ نماز پڑھ رہے ہوں اور امام مقیم (یعنی مقامی رہائشی) ہو، تو آپ کو امام کی اقتدا میں مکمل نماز ہی پڑھنی ہوگی، یعنی چار رکعت والی فرض نماز مکمل چار رکعت ہی ادا کرنی ہوگی۔

هٰذا ما عندي، والله أعلم بالصواب