سوال:

حدیث : ” جس نے سیاہ خضاب لگایا ، اللہ تعالیٰ روز قیامت اس کا چہرہ سیاہ کر دے گا۔“ کی استنادی حیثیت کیا ہے؟

جواب :

سیدنا ابودرداء رضی اللہ عنہ سے روایت ہے کہ رسول اکرم صلى الله عليه وسلم نے فرمایا:
من خضب بالسواد، سود الله وجهه يوم القيامة .
”جس نے سیاہ خضاب لگایا، اللہ تعالیٰ قیامت کے دن اس کا چہرہ سیاہ کر دے گا۔“
(مسند الشاميين للطبراني : 652 الكامل لابن عدي : 222/3، الناسخ والمنسوخ لابن شاهين، ص : 462، ح : 614 ، الأمالي للشجري : 249/2-250)
اس کی سند ضعیف ہے۔ زہیر بن محمد خراسانی جمہور کے نزدیک ثقہ ہے، لیکن اس سے اہل شام کی روایت ”ضعیف“ ہوتی ہے۔
(تقريب التهذيب : 2049)
یہ روایت بھی اہل شام کی ہے، لہذا یہ جرح مفسر ہے اور روایت ”ضعیف “ہے۔
❀ امام ابو حاتم رازی رحمہ اللہ نے اس حدیث کو موضوع (من گھڑت) کہا ہے۔
(علل الحديث لابن أبي حاتم : 299/2)