سوال

ہمارے گھر میں تقریباً دس سال سے جادو کا اثر محسوس ہو رہا ہے جس کی وجہ سے ہم سب بہت پریشان ہیں۔ ہم کئی عاملوں کے پاس بھی جا چکے ہیں، ان سے وقتی طور پر افاقہ ہو جاتا ہے مگر چند دنوں بعد وہی صورتحال دوبارہ لوٹ آتی ہے۔ بچے اکثر بیمار رہتے ہیں، کبھی سر درد، کبھی پیٹ درد کی شکایت کرتے ہیں۔ کسی کام میں دل نہیں لگتا، بات ماننے میں ضد کرتے ہیں۔ اسکول اور قرآن کے سبق کو بالکل نہیں پڑھتے۔ اگر زبردستی کہیں تو کتاب یا سپارہ تو اٹھا لیتے ہیں مگر سبق یاد نہیں ہوتا۔ اس مسئلے کا کوئی مستقل حل بتائیں۔

جواب

الحمد لله، والصلاة والسلام علىٰ رسول الله، أما بعد!

اللہ تعالیٰ سے دعا ہے کہ وہ آپ کو، آپ کی اہلیہ اور بچوں کو ہر قسم کے جادو سے محفوظ رکھے، آمین یا رب العالمین۔

روحانی علاج کا طریقہ:

آپ سب اہلِ خانہ کو درج ذیل اعمال کو روزانہ کا معمول بنا لینا چاہیے:

روزانہ نماز کے بعد:

◈ ہر فرض نماز کے بعد کم از کم ایک مرتبہ یہ سورتیں پڑھیں:

◈ سورۃ الاخلاص

◈ سورۃ الفلق

◈ سورۃ الناس

(5 مرتبہ پڑھنا بہتر ہے)

رات کو سوتے وقت:

◈ سونے سے قبل:

◈ 3 مرتبہ سورۃ الاخلاص

◈ 3 مرتبہ سورۃ الفلق

◈ 3 مرتبہ سورۃ الناس

پڑھ کر دونوں ہاتھوں پر دم کریں، پھر پورے جسم پر ہاتھ پھیر لیں۔

[بخاری ۔ کتاب فضائل القرآن۔ باب فضل المعوذات]

ایک خاص دعا جو بار بار پڑھنی ہے:

یہ دعا نماز کے پہلے اور دوسرے قعدہ میں بھی پڑھی جا سکتی ہے، نیز سجدے میں بھی پڑھی جا سکتی ہے:

اَللّٰہُمَّ اکْفِنَاہُمْ بِمَا شِئْتَ

[مسلم، کتاب الزھد، باب قصۃ اصحاب الاخدود]

ایک عظیم ذکر جو صبح و شام 100 مرتبہ پڑھنا ہے:

لاَ اِلٰہَ اِلاَّ اﷲُ وَحْدَہُ لاَ شَرِیْکَ لَہُ، لَہُ الْمُلْکُ، وَلَہُ الْحَمْدُ، وَہُوَ عَلٰی کُلِّ شَیْئٍ قَدِیْر

[بخاری، کتاب الدعوات، باب فضل التھلیل]

اہم ہدایات:

◈ لمبے اور تھکا دینے والے اذکار یا وظائف سے پرہیز کریں کیونکہ ان سے طبیعت پر بوجھ پڑ سکتا ہے۔

◈ وہ اذکار و دعائیں جو رسول اللہ ﷺ سے صحیح سند کے ساتھ منقول ہیں، ان پر عمل کرنا سب سے بہتر اور بابرکت ہے۔

◈ ان اذکار کو روزانہ مخصوص اوقات میں پابندی سے پڑھنا آپ کے اور آپ کے گھر والوں کے لیے شفایابی اور راحت کا سبب بنے گا، إن شاء الله الحنان۔

تاریخ: ۸/۸/۱۴۲۰ہـ

ماخذ حوالہ جات:

◈ [ابوداؤد۔ کتاب الوتر۔ باب فی الاستغفار]

◈ [بخاری ۔ کتاب فضائل القرآن۔ باب فضل المعوذات]

◈ [مسلم، کتاب الزھد، باب قصۃ اصحاب الاخدود]

◈ [بخاری، کتاب الدعوات، باب فضل التھلیل]