سوال:

باپ کے نام کی قسم کھانا کیسا ہے؟

جواب:

باپ کے نام کی قسم کھانا حرام اور ناجائز ہے۔
❀ سیدنا عبد الرحمن بن سمرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا:
لا تحلفوا بآبائكم ولا بالطواغيت .
”نہ اپنے آبا کی قسمیں کھاؤ اور نہ ہی بتوں کی۔“
(صحیح مسلم : 1648)
❀ سیدنا عبد اللہ بن عمر رضی اللہ عنہما بیان کرتے ہیں:
سمع النبى صلى الله عليه وسلم عمر رضى الله عنه يقول : وأبي أبي، فقال النبى صلى الله عليه وسلم : إن الله ينهاكم أن تحلفوا بآبائكم، قال : فوالله ما حلفت ذاكرا ولا آثرا .
”نبی کریم صلی اللہ علیہ وسلم نے سیدنا عمر رضی اللہ عنہ سے سنا وہ کہہ رہے تھے: میرے باپ کی قسم! میرے باپ کی قسم! نبی کریم صلی اللہ علیہ وسلم نے فرمایا: اللہ تعالیٰ تمہیں اپنے آبا کی قسمیں کھانے سے منع فرماتا ہے۔ سیدنا عمر رضی اللہ عنہ فرماتے ہیں: اللہ کی قسم! اس کے بعد میں نے کبھی اپنی طرف سے بات کرتے ہوئے یا کسی اور سے بیان کرتے ہوئے یہ (باپ کی قسم) نہیں کھائی۔“
(صحيح البخاري : 6647، صحیح مسلم : 1646)