کیا یہ کہنا درست ہے: "اللہ آپ کا حال پوچھتا ہے؟”

سوال:

کیا یہ کہنا جائز ہے کہ ’’اللہ آپ کا حال پوچھتا ہے؟‘‘
ان الفاظ کے بارے میں کیا شرعی حکم ہے: ’’اللہ آپ کے حال کے بارے میں پوچھتا ہے؟‘‘

جواب:

الحمد لله، والصلاة والسلام علىٰ رسول الله، أما بعد!

ایسے الفاظ استعمال کرنا جائز نہیں جیسے کہ:

’’اللہ آپ کے حال کے بارے میں پوچھتا ہے۔‘‘

اس کی وجہ یہ ہے کہ ان الفاظ سے ایسا مفہوم نکلتا ہے گویا (نعوذ باللہ) اللہ تعالیٰ کو کسی بات کا علم نہیں ہے، اس لیے وہ پوچھنے کا محتاج ہے۔ یہ عقیدہ انتہائی خطرناک اور غلط ہے۔

اگرچہ کہنے والے کا مقصد اور نیت یہ نہ بھی ہو کہ اللہ تعالیٰ سے کوئی چیز پوشیدہ ہے یا وہ کسی چیز کو جاننے کے لیے سوال کرتا ہے، پھر بھی ان الفاظ سے ایسا مفہوم ابھر کر سامنے آ سکتا ہے جو اللہ تعالیٰ کے علمِ کامل اور صفاتِ علیا کے خلاف ہے۔

لہٰذا ایسی لفظی ترکیبوں سے اجتناب کرنا واجب ہے تاکہ اللہ تعالیٰ کے متعلق کوئی غلط فہمی یا توہین کا شائبہ بھی نہ پیدا ہو۔

متبادل الفاظ کا استعمال:

اس کے بجائے درج ذیل جیسے مناسب اور ادب والے الفاظ استعمال کیے جائیں:

✿ ’’میں اللہ تعالیٰ سے دعا کرتا ہوں کہ وہ آپ کی حفاظت فرمائے۔‘‘
✿ ’’میں دعا کرتا ہوں کہ اللہ تعالیٰ اپنے لطف و کرم سے آپ کو نواز دے۔‘‘

ایسے جملے دعائیہ بھی ہیں اور اللہ تعالیٰ کی شان کے بھی مطابق ہیں۔

ھٰذا ما عندي، والله أعلم بالصواب