معجزات کا خالق کون؟

ایک زیر بحث آیت میں بھی یہی مذکور ہے کہ سید نا عیسی علیہ السلام کا پرندہ بناتے اور اس میں پھونکتے تو وہ اللہ تعالیٰ کے اذن سے پرندہ بن جاتا، جیسا کہ خود سیالوی صاحب نے آیت کا ترجمہ اس طرح کیا:
”پھر وہ اللہ کے اذن سے پرندہ بن جاتا ۔ “
( ندائے، ص:182)
”سیالوی صاحب اور ان کے جمیع ہم مشرب جو اس آیت سے غلط مفہوم کشید کر کے عوام الناس کو مغالطہ دیتے ہیں۔ انہیں چاہیے کہ آیت کے الفاظ پر خوب غور کریں جن سے واضح ہے کہ سیدنا مسیح علیہ السلام تو مٹی سے صرف پرندے کی ہیئت/شکل بناتے تھے اور اس پر پھونکتے تھے۔ مٹی کا وہ پتلا اللہ کے حکم سے ہی پرندہ بنتا تھا، چونکہ یہ معاملہ سید نا عیسی علیہ السلام کے ہاتھ پر ظاہر ہوتا تھا تو یہ ان کا معجزہ تھا۔ اسی طرح آپ علیہ السلام نے پرندے کی تخلیق اپنی طرف منسوب نہیں کی بلکہ پرندے کی ہیئت کی تخلیق اپنی طرف منسوب کی ہے۔ كَهَيْئَة الطَّيْرِ کے الفاظ اس پر شاہد ہیں ۔ نیز فَيَكُونُ طَيْرًا بِاِذْن کے الفاظ بھی بتا رہے ہیں کہ وہ مٹی کا پتلا اللہ کے اذن سے پرندہ بن جاتا۔ گویا خلق طیر کی مجازی نسبت بھی نہیں ہے۔ اہل ایمان تو ہمیشہ سے ان معجزات کا خالق اللہ تعالیٰ ہی کو مانتے ہیں۔ جسے اللہ سبحانہ و تعالیٰ اپنے کسی نبی علیہ السلام کی تائید و تصدیق کے لیے ان کے ہاتھ پر ظاہر فرماتے ہیں، تا کہ ان پر ایمان نہ لانے والوں کے پاس کوئی عذر باقی نہ رہے، کیونکہ قرآن مجید میں ہے: نشانیاں (معجزات ) تو صرف اللہ کے پاس ہیں۔ “
البتہ اس معاملہ میں کفار کا طریقہ و عقیدہ کچھ مختلف تھا، چنانچہ سعیدی صاحب نے (سورہ مائدہ آیت : 116) کی تفسیر میں لکھا ہے:
عیسائی یہ کہتے تھے کہ حضرت عیسی علیہ السلام اور حضرت مریم کے ہاتھوں سے جو معجزات ظاہر ہوئے ان کے خالق حضرت عیسیٰ اور حضرت مریم ہیں۔ اس لحاظ سے ان سے یہ نقل اور حکایت کرنا صحیح ہے کہ ” کیا تم نے لوگوں سے یہ کہا تھا کہ مجھے اور میری ماں کو اللہ کے سواد و خدا بنالو۔ “
( تبیان القرآن : 376/3)
3: بریلویہ کے حکیم الامت احمد یار خان نعیمی صاحب نے اسی آیت کی تفسیر میں لکھا:
”عیسائی حضرت عیسی علیہ السلام کو ان معجزات کا خالق مانتے ہیں اور حضرت مریم کو ان کی کرامات کا خالق مانتے ہیں اور ظاہر یہ ہے کہ خالق الہی ہی ہوتا ہے ان وجوہ سے یہاں واقعی فرمایا گیا۔ “
(تفسیر خازن، کبیر وغیرہ، تفسیر نعیمی ج ص:192)
اگر عیسائیوں کی طرح سیالوی صاحب اور ان کا گروہ بھی سید نا عیسیٰ علیہ السلام کو پرندہ بنانے کے معجزے کا خالق سمجھتے ہیں تو خود بتا ئیں کہ وہ عیسائیوں کے دوش بدوش چل پڑے کہ نہیں! اور بقول نعیمی و سعیدی بریلویان، عیسائیوں نے سید نا عیسی علیہ السلام کو ان معجزات کا خالق مانا تو اللہ سبحانہ و تعالیٰ نے انہیں اللہ کے سوا الہ بنانا قرار دیا۔ اگر بریلویہ بھی ایسا عقیدہ بنالیں تو اس سے یہ لازم آئے گا کہ وہ سید نا عیسی علیہ السلام کو ”الہ“ مانتے ہیں اور یہ تو خود ان کے ہاں بھی صریح شرک ہے۔ اعاذنا الله منه
الغرض ! سیالوی صاحب کے اس مغالطہ میں بھی اس بات کا ثبوت مفقود ہے کہ انبیاء کرام علیہم السلام اور اولیاء کرام من دون اللہ یعنی اللہ کے علاوہ نہیں۔ اس کے ساتھ ہی سیالوی صاحب کی نام نہاد ” نفیس بحث“ کا اختتام ہوا ہے۔ آگے انھوں نے جو بحث چھیڑی ہے وہ اس مضمون کے موضوع سے خارج ہے۔ الحمد للہ صریح دلائل کے مقابلہ میں سیالوی صاحب کے مغالطات و عقلی ڈھکوسلوں کی حقیقت بخوبی ظاہر ہوگئی۔

احمد سعید کاظمی اور من دون اللہ

قارئین کرام احمد خان نعیمی و غلام نصیر الدین سیالوی صاحب نے تو علی الاطلاق یہ دعوی کر رکھا ہے کہ انبیاء علیہم السلام اور اولیاء کرام من دون الله میں شامل نہیں۔ لیکن بریلویہ کے امام اہلسنت غزالی زمان و رازی دوراں احمد سعید کاظمی ملتانی صاحب نے ان کے موقف کے برعکس کچھ مختلف نظریہ پیش کیا ہے، ملاحظہ کیجئے لکھا ہے:
من دون الله کے بارے میں اس امر کا اظہار بھی ضروری ہے کہ قرآن مجید کی وہ سب آیات جن میں غیر اللہ کی الوہیت کی نفی اور ماسوا اللہ کی عبادت کی ممانعت و مذمت وارد ہے۔ یقیناً تمام انبیاء واولیاء علیہم السلام کی الوہیت کی نفی اور ان کی عبادت کی مذمت و ممانعت کی قطعی دلیلیں ہیں اور بے شک عقیدہ توحید اصل دین ہے۔
(البیان ص: 10)
ملتانی صاحب نے ”لیکن“ کے بعد جو لکھا وہ بھی ہم نقل کریں گے۔ ان شاء اللہ مگر پہلے یہ عرض کر دیا جاتا ہے کہ درج بالا اقتباس میں جناب نے صاف اور صریح الفاظ میں اس حقیقت کا اعتراف کر دیا کہ من دون الله یا غير الله یا ماسوي الله یعنی اللہ کے علاوہ کے عبادت کی ممانعت و مذمت پر مبنی جتنی آیات ہیں وہ یقیناً تمام انبیاء علیہم السلام اور اولیاء کرام کی الوہیت وعبادت کی مذمت وممانعت کی قطعی دلیلیں ہیں۔
سیالوی صاحب سے سوال یہ ہے کہ ان کے نزدیک تو انبیاء علیہم السلام اور اولیاء کرام تو من دون الله میں داخل و شامل ہے۔ پھر کاظمی صاحب نے ایسا کیوں کہا؟ الغرض کہ کاظمی صاحب کا یہ کہنا واضح کرنا ہے کہ انبیاء علیہم السلام و اولیاء کرام کو من دون اللہ نہ سمجھنا قطعاً و یقیناً غلط ہے۔ اب کاظمی ملتانی صاحب کی مزید سنیں ،لکھا ہے:
لیکن انہیں ” من دون الله “ اور ”من دونه “ کے مفہوم میں اس اعتبار سے شامل کرنا کہ وہ مطلقاً کسی تصرف یا حکم کے اہل نہیں ، خواہ ان کا وہ تصرف اور وہ حکم باذن اللہ ہی کیوں نہ ہو ، نصوص قرآنیہ کے خلاف ہے بلکہ اس اعتبار سے غیر اللہ کے کسی فرد کو بھی ان آیات کے مفہوم میں شامل کرنا درست نہیں ہے ۔
( البیان ص: 10)
اس بات سے تو کاظمی صاحب بھی انکار نہ کر سکے کہ انبیاء کرام علیہم السلام اور اولیاء من دون الله میں شامل نہیں یا اللہ کے علاوہ، غیر اللہ نہیں اور کوئی بھی عقل مند و منصف مزاج فرد اس سے انکار نہیں کر سکتا۔ اب قرآن مجید یا نصوص سنت میں جن باتوں کا اثبات ہے اس حد تک اسے تسلیم کرنا فرض ولازم ہے۔ اسی طرح قرآن مجید و احادیث مبارکہ میں من دون الله کے بارے میں جن چیزوں کی نفی ہے ان تمام کی نفی کا عقیدہ رکھنا بھی فرض ولازم ہے۔ یہ عجیب بات ہے کہ جب الوہیت وعبادت کی نفی کا معاملہ ہوتو من دون الله کے تمام افراد حتی کہ انبیاء علیہم السلام کو بھی اس میں شامل و داخل سمجھا جائے لیکن جب دعائیں قبول کرنے ، فریاد سننے، مشکل کشائی و حاجت روائی کی نفی ہوتو انبیاء علیہم السلام کے علاوہ اولیاء کرام کو بھی من دون الله میں داخل و شامل نہ سمجھا جائے۔ آخر اس فرق کی وجہ اور دلیل کیا ہے؟
خود اللہ رب العالمین کے نازل فرموده (خواہ وہ قرآن کی شکل میں ہو یا احادیث کی شکل ) میں ) دلائل سے یہ ثابت ہوتا ہے کہ غیر اللہ کی پوجا پاٹ و پرستش میں مبتلا ہونے والے اور ان سے اسباب سے ہٹ کر مشکل کشائی چاہنے والوں نے محض خیالی بتوں ہی کی پوجا پاٹ نہیں کی بلکہ مقربان الہی کی مرضی و تعلیمات کے خلاف ان کی پرستش کرنے لگے تھے۔ لیکن اللہ تعالیٰ نے اس معاملہ میں نیک لوگوں کے استثناء کے بجائے مِنْ دُونِ اللهِ من دونه یا غير الله جیسے عام الفاظ سے جمیع ماسوی اللہ کی نفی فرمادی۔ مثال کے طور پر اللہ تعالیٰ کا یہ فرمان:
قُلِ ادْعُوا الَّذِينَ زَعَمْتُم مِّن دُونِهِ فَلَا يَمْلِكُونَ كَشْفَ الضُّرِّ عَنكُمْ وَلَا تَحْوِيلًا ‎ ﴿٥٦﴾ ‏ أُولَٰئِكَ الَّذِينَ يَدْعُونَ يَبْتَغُونَ إِلَىٰ رَبِّهِمُ الْوَسِيلَةَ أَيُّهُمْ أَقْرَبُ وَيَرْجُونَ رَحْمَتَهُ وَيَخَافُونَ عَذَابَهُ ۚ إِنَّ عَذَابَ رَبِّكَ كَانَ مَحْذُورًا ‎ ﴿٥٧﴾ ‏
(17-الإسراء:56، 57)
کاظمی ملتانی صاحب سے ہی ان آیات کا ترجمہ ملاحظہ کیجئے ،لکھا ہے: آپ انہیں فرما ئیں۔
” پکارو انہیں جنہیں تم اللہ کے سوا (معبود) سمجھتے ہو تو وہ اختیار نہیں رکھتے تم سے تکلیف دور کرنے اور نہ بدل دینے کا۔ وہ (نیک بندے) جنہیں کا فر پوجتے ہیں خود ہی اپنے رب کی طرف وسیلہ تلاش کرتے ہیں کہ ان میں کون زیادہ مقرب ہے اور اس کی رحمت کے امیدوار ہیں اور اس کے عذاب سے ڈرتے ہیں، بے شک آپ کے رب کا عذاب ڈرنے کی چیز ہے۔ “
( البیان ص: 460)
تیسرے سیالوی مغالطہ کے رد میں یہ آیات اور بریلوی مفسر سعیدی صاحب سے ان کی تفسیر ہم نقل کر آئے ہیں، اب پیر آف بھیرہ محمد کرم شاہ از ہری صاحب سے اس کی تفسیر ملاحظہ کیجئے ، لکھا ہے:
مطلب یہ ہے کہ مشرکین جن کو خدا بنائے ہوئے ہیں اور جن کو اپنی تکالیف و مصائب میں پکارتے ہیں یہ خدا نہیں بلکہ وہ تو خود ہر لمحہ، ہر لحظہ اپنے رب کریم کی خوشنودی حاصل کرنے کے لیے مصروف عمل رہتے ہیں۔ اگر واقعی وہ خدا ہوتے جیسے مشرکین کا خیال ہے تو پھر انہیں کسی کی عبادت اور رضا جوئی کی کیا ضرورت تھی ۔
(ضیاء القرآن 2/ 1339)
اب ان آیات پر غور کیجئے ، ان آیات میں بت،ستارے، سیارے اور شیاطین کی عبادت اور انہیں مشکل کشا و فریا در سا سمجھنے کا تذکرہ نہیں بلکہ نیک صالح اور پارسا لوگوں کو پکارنے کا ذکر ہے۔ جنھیں وہ مشرک مشکل کشا، حاجت روا، بگڑیاں بنانے والے اور بیڑے تارنے والے سمجھ بیٹھے ہیں، بلاشبہ وہ اللہ کے پیارے اور محبوب بندے تھے، جیسا کہ قرآن نے گواہی دی۔ لیکن اس کے باوجود اللہ تعالیٰ نے فرمایا کہ جنھیں تم اللہ کے سوا پکارتے ہو، اپنا حاجت روا مشکل کشا سمجھتے ہوا نہیں پکارو ﴿فَلَا يَمْلِكُونَ كَشْفَ الضُّرِّ عَنكُمْ﴾ وہ تم سے تکلیف دور کرنے کا اختیار نہیں رکھتے ، تکلیف ٹالنا تو دور وہ اس تکلیف کو پھیر بھی نہیں سکتے ۔ پھر آگے ، ان کی نیکی تقوی ، عبادت ، خوف وخشیت کے افعال محمودہ کا تذکرہ بھی فرمایا۔
جب معاملہ یہ ہے کہ اللہ تعالیٰ نے نیک لوگوں کے تصرف واختیار کی نفی فرما کر انہیں پکارنے کی مذمت بیان کی اور جمیع من دونہ سے نفی کی تو قرآنی تعلیمات کو نظر انداز کر کے کاظمی ملتانی خود ساختہ تاویل کس طرح اور کیوں اپنائی جائے ؟

المختصر :

کاظمی صاحب کا تصرف واختیار کے معاملہ میں یہ کہنا کہ اس اعتبار سے غیر اللہ کے کسی فرد کو بھی ان آیات کے مفہوم میں شامل کرنا درست نہیں ہے ۔ غلط اور قرآن مجید کے خلاف ہے۔ کاظمی صاحب نے بزعم خود دلیل پیش کرتے ہوئے لکھا:
ایسی تمام آیات میں من دون الله سے بغير اذن الله مراد ہے۔ مثلاً آیت: ﴿وَلَا يَتَخِذَ بَعْضُنَا بَعْضًا أَرْبَابًا مِنْ دُونِ الله﴾ میں من دون الله کے تحت تفسیر مظہری میں فرمایا: ” أى بغير اذن من الله یعنی اللہ کی جانب سے اذن کے بغیر ( ج 2 ص : 63) یعنی کسی کو ذاتی تصرف یا ذاتی حکم کا اہل مانا اور بغیر اذن الہی کے اُس کے حکم کو واجب العمل قرار دینا، گویا اُسے اپنا رب بنا لینا ۔
( البیان ص: 10)
اس تاویل سے بھی بریلویہ کی مشکل آسان نہیں ہوتی ، چونکہ قرآن مجید اور احادیث مبارکہ میں کہیں بھی غیر اللہ سے دعا مانگنے کا حکم واذن نہیں، بلکہ اللہ ہی سے دعا مانگنے کا حکم ہے۔ اگر بات ذاتی و عطائی کی ہو تو ہم کہہ سکتے ہیں کہ وہ آیات یا احادیث پیش کی جائیں جن سے اس بات کا ثبوت ملتا ہو کہ انبیاء علیہم السلام اور صالحین کرام عطائی طور پر دعا اور فریاد قبول کر سکتے ہیں، لہذا ان سے دعائیں مانگی جائیں انہیں پکارا جائے۔ اگر آیت یا حدیث نہیں ملتی اور یقینا نہیں ملتی تو اللہ کی جانب سے اذن کا ثبوت نہیں۔
مزید مثال نقل کرتے ہوئے کاظمی صاحب نے لکھا:
اور کسی حکم یا تصرف باذن اللہ ہو تو وہ من دون الله کے مفہوم میں شامل نہیں۔ جیسا کہ حضرت عیسی علیہ السلام کا مقولہ قرآن مجید میں وارد ہے:
﴿أَنِّي أَخْلُقُ لَكُم مِّنَ الطِّينِ كَهَيْئَةِ الطَّيْرِ فَأَنفُخُ فِيهِ فَيَكُونُ طَيْرًا بِإِذْنِ اللَّهِ﴾
(3-آل عمران:49)
”کہ میں تمہارے لیے مٹی سے پرندے جیسی صورت بناتا ہوں پھر میں اُس میں پھونک مارتا ہوں تو وہ اڑنے والی ہو جاتی ہے باذن اللہ ، یعنی اللہ کے حکم سے اور میں شفایاب کرتا ہوں مادر زاد اندھے اور برص والے کو اور میں جلاتا ہوں مردے باذن اللہ یعنی اللہ کے حکم سے۔ “
”معلوم ہوا اپنی طرف سے تصرف کرنے یا ذاتی حکم کا کوئی اہل نہیں بلکہ بغیر اذن اللہ ایک تنکا بھی متحرک نہیں ہو سکتا اور باذن الله اللہ کے محبوبوں کے تصرف سے بے جان جسم میں جان بھی پڑ سکتی ہے اور اذن الہی سے وہ مردوں کو بھی جلا سکتے ہیں ۔ “
( البیان ص: 11،10)
تعجب ہے ان کے ”غزالي زمان“ و” امام اهلسنت“ کہاں کی بات کہاں جوڑ بیٹھے! آیت جو پیش کی اُس میں سید نا عیسی علیہ السلام کے معجزات کا ذکر ہے، جیسا کہ اس آیت کے آغاز میں اس کی صراحت ہے۔ لیکن سیالوی صاحب کی طرح کاظمی صاحب نے بھی آیت کے اُس حصہ کو پیش کرنا مناسب نہ سمجھا کہ اس طرح بات بنانا کچھ مشکل ہو جاتا ہے۔ بہر حال عیسی علیہ السلام کے اس ” مقولہ“ میں سب سے پہلے اس بات کی صراحت ہے کہ ﴿أَنِّي قَدْ جِئْتُكُم بِآيَةٍ مِّن رَّبِّكُمْ﴾ ” میں تمہارے رب کی طرف سے نشانی لے کر آیا ہوں۔“ اور ہم عرض کر آئے ہیں کہ ”نشانی معجزہ“ ہے، جو اللہ کا فعل ہے اور کسی نبی علیہ السلام کے ہاتھوں ظاہر ہوا۔ اسے اُس نبی علیہ السلام کا تصرف قرار دینا نصاری کے اس ذہن کی غمازی ہے کہ معجزات کے خالق عیسی علیہ السلام تھے (نعوذ باللہ ) پھر یہ بات بھی قابل غور ہے کہ آیت میں خاص سید نا عیسی علیہ السلام کے معجزات کا ذکر ہے، لیکن بریلویہ کے رازی دوران و امام اہلسنت اپنی منطق کی کھینچا تانی سے اسے عام کرتے ہوئے لکھ گئے کہ معلوم ہوا . اللہ کے محبوبوں کے تصرف سے بے جان جسم میں جان پڑ سکتی ہے۔ یقیناً یہ نظریہ ضرورت کار فرمائی ہے، چونکہ ان کا یہی عقیدہ ہے تو اس کے ثبوت کے لیے سید نا عیسی علیہ السلام کے معجزہ والی آیت نقل کر کے محبوبوں کا استدلال کر دیا، تا کہ اپنے اس عقیدہ کا ثبوت بنا ئیں کہ اولیاء کرام بھی بیماری سے شفا دے سکتے ہیں، اندھوں کو انکھیارا کر سکتے ہیں۔ مردوں کو زندہ کر سکتے ہیں باذن اللہ مشکل کشائی اور حاجت روائی کر سکتے ہیں۔ حالانکہ قرآن وحدیث میں اس کا کوئی ثبوت نہیں ملتا۔ مزید تفصیل کے لیے سیالوی صاحب کا مغالطہ اور اس کا جواب دیکھ لیجیے۔
کاظمی صاحب نے مزید لکھا:
”یعنی من دون الله کوئی کچھ نہیں کر سکتا اور باذن الله بندہ وہ سب کچھ کر سکتا ہے جس کے ساتھ اللہ کا اذن متعلق ہو جائے ۔ “
(البیان ص: 11)
گویا اللہ تعالیٰ نے من دون الله یعنی اللہ کے علاوہ فرما کر تمام لوگوں کے جن جن قوتوں کی نفی فرمائی۔ کاظمی صاحب نے اپنی اس منطق سے اُن تمام کا اثبات کر دیا۔ اگر ان کی یہ تاویل باطل نہیں تو قرآن مجید میں اللہ تعالیٰ نے نفی کیوں فرمائی جبکہ من دون الله کہنے سے جمیع ماسوی اللہ کی نفی ہوتی ہے۔
پھر کاظمی صاحب نے یہ بھی کہا کہ باذن الله بندہ وہ سب کچھ کر سکتا ہے جس کے ساتھ اللہ کا اذن متعلق ہو جائے، آئیے دیکھتے ہیں جسے یہ لوگ ”ولي“ قرار دیتے ہیں وہ کیا کچھ کر سکتا ہے؟
قارئین کرام آپ نے بھی ایسے کئی ایک قصے سنے ہوں گے، ان قصوں کا بیان تو کافی طوالت کا باعث بنے گا۔ ان کے ایک ”علامہ و مفتی “محمد اکمل عطا قادری عطاری صاحب نے انبیاء و اولیاء سے مدد طلب کرنے کے بارے میں بزعم خود دلائل دیتے ہوئے ایک کتاب لکھی ہے ”غیر اللہ سے مدد مانگنا کیسا؟“ یہ کتاب ” مکتبہ اعلیٰ حضرت، سرائے مغل جنازہ گاہ مزنگ لاہور“ سے شائع ہوئی ہے۔ اس کے (صفحہ 50 )پر ایک ہائیڈ نگ دی گئی ہے اولیاء کرام کے مددفرمانے کے واقعات، پھر مختلف عنوانات قائم کیے ہر عنوان کے تحت مدد کا قصہ بھی نقل کیا، اس کے عنوانات سے ہی اندازہ ہو جاتا ہے کہ یہ اپنے اولیاء کے لیے کسی تصرف کے قائل ہیں، چند عنوانات ملاحظہ کیجیے:
(1) ” گمشدہ اونٹ واپس دلوادیے؟“ (ص : 50)
(2) ”منہ مانگی نعمتیں عطا فرمادی“ (ص : 51)
(3) ”دریا کو بڑھنے سے روک دیا“ (ص : 58)
(4) ”شفا عطا فرمادی“ (ص:61)
(5)” آنکھ ٹھیک کردی“ (ص: 63)
(6)” فالج زدہ کو ٹھیک کر دیا “(ص: 66)
(7) ” بیٹا عطا فرمادیا “ (ص: 72 )
(8) ”اللہ کے حکم سے موت کو ٹال دیا “(ص: 81)
(9) ”لاٹھی کو انسان بنادیا“ (ص:82)
(10)” بیمار کوتندرست کر دیا “(ص:93)
کاظمی صاحب کے معتقدین بتائیں کہ اولیاء کے ان تصرفات کا اللہ کے اذن سے ہو جانے کی دلیل کیا ہے، قرآن و حدیث کی کون سی نص ہے جس سے یہ ثابت ہوتا ہے کہ اولیاء کرام ان تمام تصرفات پر باذن الله یا اللہ کی عطا سے عطائی قدرت رکھتے ہیں؟ خلاصہ بحث یہ ہے کہ قرآن مجید کی آیات اور اسی طرح احادیث میں جہاں کہیں من دون الله کے الفاظ وارد ہوئے یا اللہ تعالیٰ کے ذکر کے بعد من دونه کے الفاظ آئے وہاں ان الفاظ سے ہر وہ ذات مراد ہے جو اللہ کے علاوہ ہے۔ اولیاء اور محبو بانِ الہی کو ان سے خارج قرار دینا درست نہیں۔ سر دست اسی پر اکتفاء کرتے ہیں۔ ان شاء اللہ بشرط زندگی کسی دوسری فرصت میں طاہر القادری صاحب کے دلائل کا جائزہ لیں گے، و باللہ التوفیق

من دون اللہ کا صحیح مفہوم

بریلویہ کے اس نظریے کا ثبوت

جواب :

ترجمہ:

نمبر 1۔ دُونَ :

من دون اللہ اور انبیاء ( علیہ السلام ) واولیاء

پہلی دلیل:

دوسری دلیل :

تیسری دلیل :

چوتھی دلیل :

پانچویں دلیل:

بندوں کو کارساز بنانا شرک ہے

چھٹی دلیل :

فریق ثانی کے مغالطات

پہلا سیالوی مغالطہ :

جواب:

دوسرا سیالوی مغالطہ:

جواب :

تیسرا سیالوی مغالطہ:

جواب :

تنبیہ:

تنبیہ:

تنبیه :

چوتھا سیالوی مغالطہ :

جواب:

پانچواں سیالوی مغالطہ :

جواب:

چھٹا سیالوی مغالطہ :

جواب:

ساتواں سیالوی مغالطہ :

آٹھواں سیالوی مغالطہ :

جواب :

نواں سیالوی مغالطہ :

جواب :

سیالوی صاحب اور کلیات

جواب :

دسواں سیالوی مغالطہ :

جواب :

جواب :

بارہواں سیالوی مغالطہ :

جواب:

تیرہواں سیالوی مغالطہ :

جواب :

چودہواں سیالوی مغالطہ :

جواب:

پندرھواں سیالوی مغالطہ:

جواب :

تنبيه:

معجزات کا خالق کون؟

احمد سعید کاظمی اور من دون اللہ

المختصر :

یہ پوسٹ اپنے دوست احباب کیساتھ شئیر کریں

موضوع سے متعلق دیگر تحریریں:

تبصرہ کریں جواب منسوخ کریں

ہمارے پروجیکٹس

اہم روابط

ہمارے متعلق