سوال

جنت میں اہل جنت کے لیے اللہ رب العزت کا دیدار سب سے بڑی نعمت ہوگا یا اللہ کا راضی ہونا سب سے بڑی نعمت ہوگا؟

جواب از فضیلۃ العالم حافظ خضر حیات حفظہ اللہ

جنت میں اللہ تعالیٰ کا دیدار سب سے بڑی نعمت قرار دیا گیا ہے۔ تاہم، دیدار اور اللہ کی رضا دونوں ایک دوسرے سے وابستہ ہیں، کیونکہ اللہ کا دیدار صرف انہیں نصیب ہوگا جن سے اللہ راضی ہوگا۔

قرآن سے دلائل

• ◄ سورۃ القیامہ:
  "وُجُوهٌ يَوْمَئِذٍ نَاضِرَةٌ إِلَى رَبِّهَا نَاظِرَةٌ”
  (القیامہ: 22-23)
  ’’اس دن کئی چہرے تر و تازہ ہوں گے، اپنے رب کی طرف دیکھنے والے‘‘۔
• ◄ سورۃ یونس:
  "لِلَّذِينَ أَحْسَنُوا الْحُسْنَى وَزِيَادَةٌ”
  (یونس: 26)
  ’’جن لوگوں نے نیکی کی، ان کے لیے نہایت اچھا بدلہ اور کچھ زیادہ ہے‘‘۔

مفسرین کے مطابق

• ◄ "الحسنى” سے مراد جنت ہے۔
• ◄ "الزيادة” سے مراد اللہ تعالیٰ کا دیدار ہے۔

حدیث سے دلیل

رسول اللہ صلی اللہ علیہ وسلم نے فرمایا:

"إِذَا دَخَلَ أَهْلُ الْجَنَّةِ الْجَنَّةَ، قَالَ: يَقُولُ اللهُ تَبَارَكَ وَتَعَالَى: تُرِيدُونَ شَيْئًا أَزِيدُكُمْ؟ فَيَقُولُونَ: أَلَمْ تُبَيِّضْ وُجُوهَنَا؟ أَلَمْ تُدْخِلْنَا الْجَنَّةَ، وَتُنَجِّنَا مِنَ النَّارِ؟ قَالَ: فَيَكْشِفُ الْحِجَابَ، فَمَا أُعْطُوا شَيْئًا أَحَبَّ إِلَيْهِمْ مِنَ النَّظَرِ إِلَى رَبِّهِمْ عَزَّ وَجَل”

(صحیح مسلم: 181)
’’جب جنت والے جنت میں داخل ہو جائیں گے، اللہ تبارک و تعالیٰ فرمائے گا: تمہیں مزید کچھ چاہیے؟ وہ عرض کریں گے: کیا تو نے ہمارے چہرے روشن نہیں کیے؟ کیا تو نے ہمیں جنت میں داخل نہیں کیا اور دوزخ سے نجات نہیں دی؟ اس پر اللہ تعالیٰ پردہ ہٹا دے گا، اور اہل جنت کے لیے اپنے رب عزوجل کا دیدار سب سے زیادہ محبوب ہوگا‘‘۔

دعا

اللهم اجعلنا منہم