سوال :

نبی کریم صلی اللہ علیہ وسلم کن الفاظ کے ساتھ نماز میں داخل ہوتے تھے ۔

جواب :

نبی کریم صلی اللہ علیہ وسلم ہمیشہ” اللہ اکبر “کے الفاظ کے ساتھ نماز میں داخل ہوتے تھے۔
❀ سید نا علی بن ابی طالب رحمہ اللہ بیان کرتے ہیں:
إن رسول الله صلى الله عليه وسلم كان إذا قام للصلاة، قال : الله أكبر .
”رسول اللہ صلی اللہ علیہ وسلم جب نماز کے لیے کھڑے ہوتے تو اللہ اکبر کہتے “
(مسند البزار : 536، وسنده حسن ، أصله في صحيح مسلم : 771)
❀ سید نا ابوحمید ساعدی رضی اللہ عنہ بیان کرتے ہیں :
كان رسول الله صلى الله عليه وسلم إذا قام إلى الصلاة، استقبل القبلة، ورفع يديه، وقال : الله أكبر .
”رسول اللہ صلی اللہ علیہ وسلم جب نماز کے لیے کھڑے ہوتے ، تو قبلہ رُخ ہوتے ، رفع الیدین کرتے اور اللہ اکبر کہتے تھے ۔“
(سنن ابن ماجه : 803 ، وسنده حسن)
امام ابن خزیمہ رحمہ اللہ (587) اور امام ابن حبان رحمہ اللہ (1865) نے ”صحیح“ قرار دیا ہے۔
❀ علامہ قرطبی رحمہ الله (671 ھ ) فرماتے ہیں:
هذا نض صريح وحديث صحيح فى تعيين لفظ التكبير .
”اللہ اکبر کے تعین میں یہ واضح نص اور صحیح حدیث ہے۔“
(تفسير القرطبي : 176/1)
❀ سیدہ عائشہ رضی اللہ عنہا بیان کرتی ہیں :
كان رسول الله صلى الله عليه وسلم يستفتح الصلاة بالتكبير
”رسول اللہ صلی اللہ علیہ وسلم نماز کی ابتدا اللہ اکبر سے کرتے تھے۔“
(صحیح مسلم : 498)
❀ علامہ ابن الجوزی رحمہ اللہ (597ھ) فرماتے ہیں:
هذا دليل على أنها لا تنعقد إلا بالتكبير .
” یہ دلیل ہے کہ نماز اللہ اکبر کے ساتھ ہی منعقد ہوتی ہے۔“
(كشف المُشكل : 415/4)