جنت میں مردوں کے لیے حور عین ہیں، تو عورتوں کو کیا ملے گا؟

سوال:

مردوں کو تو جنت میں حور عین عطا کی جائیں گی، تو کیا عورتوں کے لیے بھی کچھ انعامات ہوں گے؟ کیا عورتوں کو بھی ازدواجی نعمت نصیب ہوگی؟

جواب:

الحمد لله، والصلاة والسلام علىٰ رسول الله، أما بعد!

اللہ رب العزت نے اہلِ جنت کے لیے نعمتوں کی وضاحت کرتے ہوئے قرآن مجید میں ارشاد فرمایا:

﴿وَلَكُم فيها ما تَشتَهى أَنفُسُكُم وَلَكُم فيها ما تَدَّعونَ ﴿٣١﴾ نُزُلًا مِن غَفورٍ رَحيمٍ ﴿٣٢﴾﴾
… سورة فصلت
’’اور وہاں جس (نعمت) کو تمہارا جی چاہے گا تم کو ملے گی اور جو چیز طلب کرو گے تمہارے لیے موجود ہوگی (یہ) بخشنے والی مہربان ذات کی طرف سے مہمانی ہے۔‘‘

اسی طرح ایک اور مقام پر فرمایا:

﴿وَفيها ما تَشتَهيهِ الأَنفُسُ وَتَلَذُّ الأَعيُنُ وَأَنتُم فيها خـلِدونَ ﴿٧١﴾﴾
… سورة الزخرف
’’اور وہاں جو جی چاہے اور آنکھوں کو اچھا لگے (موجود ہوگا) اور (اے اہل جنت!) تم اس میں ہمیشہ رہو گے۔‘‘

ان آیاتِ مبارکہ سے واضح ہوتا ہے کہ جنت میں اہلِ ایمان کو ہر وہ چیز دی جائے گی جس کی ان کا دل خواہش کرے گا اور جو ان کی آنکھوں کو بھلی لگے گی۔

عورتوں کے لیے بھی مکمل اجر و انعامات

انسانی طبیعت میں شادی کی خواہش فطری طور پر شامل ہے، اور یہ خواہش مرد و عورت دونوں میں پائی جاتی ہے۔ اس لیے جنت میں مردوں کے ساتھ ساتھ عورتوں کے لیے بھی اس نعمت کا مکمل اہتمام کیا جائے گا۔

دنیا میں شادی شدہ عورت:

اگر کوئی عورت دنیا میں شادی شدہ تھی، تو جنت میں اللہ تعالیٰ اس کی شادی اُسی شوہر سے کرے گا، جیسا کہ ارشادِ ربانی ہے:

﴿رَبَّنا وَأَدخِلهُم جَنّـتِ عَدنٍ الَّتى وَعَدتَهُم وَمَن صَلَحَ مِن ءابائِهِم وَأَزوجِهِم وَذُرِّيّـتِهِم إِنَّكَ أَنتَ العَزيزُ الحَكيمُ ﴿٨﴾﴾
… سورة غافر
’’اے ہمارے پروردگار! ان کو ہمیشہ رہنے کی بہشتوں میں داخل کر جن کا تو نے ان سے وعدہ کیا ہے اور جو ان کے باپ دادا اور ان کی بیویوں اور ان کی اولاد میں سے نیک ہوں ان کو بھی، بے شک تو غالب، حکمت والا ہے۔‘‘

دنیا میں غیر شادی شدہ عورت:

اگر کسی عورت نے دنیا میں شادی نہیں کی، تو اللہ تعالیٰ جنت میں اس کے لیے ایسا شوہر پیدا فرمائے گا جو اس کی آنکھوں کی ٹھنڈک کا سبب ہوگا، اور اس کی خواہش کی مکمل تکمیل کا ذریعہ بنے گا۔

ھٰذا ما عندی واللہ أعلم بالصواب